...

Husi: Fidelis Leite-Magalhães, Porta Voz e Terceiro Vice-Presidente ba Ekipa da Vitória

KOMPRENDE LIÚTAN TAUR MATAN RUAK NIA VIZAUN KONA-BA DEMOKRASIA NO SEGURANSA:

Hare’e ba kondisaun rai laran ne’ebé hatudu hela katak depois de libertasaun ba rai nee, ita nian povu seidauk hetan liberdade husi kiak no mukit maka Taur Matan Ruak, hakat mai oin hodi kandidatu ninia án ba Prezidente da Repúblika periodu 2012-2017. Hanesan nia dehan katak “uluk hau jura fo án ba mate ba rai ida nee agora hau jura atu servi deit imi”, Taur Matan Ruak nian partisipasaun iha prosesu demokratiku hanesan dalan ida hodi bele fo dala ida tan nia kontribuisaun ba rai no povo doben ida nee. Taur Matan Ruak nian entrada ba iha palku politika nasional nee atu halibur ema hotu; husi partidus, grupos, relijiaun no fatin hotu-hotu. Nunee nia kandidatura nee hanesan independente no hanesan nia dehan dala fila-fila katak: “hau mai atu halibur, la’os hafahe. Atu hafahe hau la mai.”

Alem de ida nee, Taur Matan Ruak nian prioridade ba prezidensia inklui mos ba konstrusaun da nasaun. Laos deit atu hametin Liútan funsionamentu du estadu, Taur Matan Ruak mós hakarak hare’e ba konstrusaun nasaun nian. Iha nee, nia fo atensaun ba oin sa hametin Liútan unidade no identidade nasional. Atu halo ida nee posivel no ba sustentabilidade husi prosesu, laíha dalan seluk se laos enkoraja liutan ita nian foin sa’e sira iha prosesu hotu iha ita nia vida estadu no nasaun nian.

Taur Matan Ruak hahu nia kareira hanesan soldadu iha ai-laran funu hasoru forsa invasor Indonesia ne’ebé okupa ita nia rai nakonu ho terus oioin durante tinan 24 nia laran. Durante funu nia laran nia komesa asumi funsoens oi-oin husi soldadu bai-bain no hetan promosaun lubuk to sa’e ba pozisaun hanesan Chefe Estado Maior das Falintil i to’o ikus wainhira Comandante das Falintil Nino Konis Santana mate iha Mertutu iha 1998, Taur Matan Ruak mos asume kargu husi nia. Tuirmai-nee quando Comandante em Chefe Kay Rala Xanana Gusmão rezigna án husi Falintil iha tinan 2000, Taur assume kedan fatin nee. Nunee iha momento FALINTIL transforma husi Forsa guerilha nian ba Forsa konvensional iha país demokratiku ida, Taur Matan Ruak mos asume kargu hanesan Komandante Geral das FALINTIL-FDTL. Ho nia lideransa maka ohin loron, maske hakat liu dezafius oi-oin, F-FDTL sai forsa defeza ida ne’ebé professional. Transformasaun ne’ebé akontese ba F-FDTL hanesan mos experiensia foun ida ba mundu tomak katak forsa “rebelde” ida konsegue transforma direitamente ba forsa konvensional ida.

Experiensia hirak nee hotu maka serve hanesan fundasaun ba personalidade Taur Matan Ruak nian nudar ema bai-bain no hanesan lider militar ida. Taur Matan Ruak hanesan ema ida ne’ebé hatene hanoin husi ema kiik nian, laos deit ema bo’ot nian, tamba nia hahu nia kareira militar hanesan soldadu kiik. Laos komesa hanesan ema bo’ot”. Ida nee mos fomenta maneira ida ne’ebé diferente husi lider militar sira seluk: nia kapasidade atu rona. Tuirmai-nee kapasidade hirak nee sai metin Liútan tamba wainhira iha ailaran nia aprende katak se la ho soldadu sira komandante sei laíha folin. Interdependensia entre lideransa ho ninian soldadu sira nee maka fo influensia ba Taur Matan Ruak nia hanoin no personalidade. Alende nee, nia experiensia terus ba tinan barak iha ailaran hanorin nia ba buat balun tuir mai-nee:

1. Nia aprende hadomi povo no rai doben Timor Leste,
2. Nia aprende katak se laos luta ba povo ida nee karik luta no terus iha pasadu sei laíha folin.
3. Nia aprende katak sai lider para atu serve laos para ema servi.
4. Nia mos laos deit aprende atu oinsa bele habelar liutan tatika to estratejia militar, maibe’e oin nusa bele konvense povu hodi fiar ba mehi ukun rasik án. Aspetu ida nee mos hanesan aspetu ne’ebé hatudu ninian kualidade natural nudar lider politiko-militar ida.

Oras nee ex-Major Jeneral Taur Matan Ruak mai fali ona vida sivil hodi lansa ninian kandidatura ba Prezidente da Republika. Iha kontextu nee, Taur Matan Ruak mós mai duni preparado. Ninia ideias sira ne’ebé maka nia aprezenta mesak estruturante no nia iha duni vizaun ba oin. Ami hanoin ninia preparasaun ba ninia pensamento ba kampaña hatudu duni katak:

1. Prezidente ida tenke iha ninia vizaun rasik kona ba nasaun nian moris iha futuru. Povu sei hili ba Prezidente ida ne’ebé ho ninian matenek rasik bele iha hanoin ida diak liúba nasaun nee.
2. Vizaun hirak nee maka sei sai baze ba nia mensajem ba estadu no wainhira nia bolu konsiensia nasaun nian.

Nunee iha parte maktuir, ami sei aprezenta ami nia interpretasaun kona ba Taur Matan Ruak nia hanoin kona ba Demokrasia no Seguransa:

I. Demokrasia

Nia hakarak maka Timor Leste sai país ida ne’ebé nakonu ho prospieridade ho liberdade iha futuru. Povu doben ida nee sei iha asesu ba saude, ba ai-han no ba edukasaun ba la barik sira iha futuru. Hanesan Amilcar Cabral dehan tinan hat-nolu resin liúba iha mensagem ba povu Guinense, “povu la luta ba independensia ba konseitu abstratu ida hanesan liberdade ka ukun án, maibe’e sira hakarak atu iha futuru sira nia oan sira moris ho dignidade. Iha aksesu ba aihan, ba edukasaun no moris la ho tauk”. Ida nee maka tenke sai pilar ba ita nia nasaun nia futuru. Maibe’e para hetan buat hirak nee ita presiza sistema governasaun ida ne’ebé maka bele garantia para ita nia nasaun bele hetan buat hirak temi tiha ona. Ba moris diak ita tenke iha sistema governasaun ida ne’ebé governantes sira sei hatan (responsive) ba nesesidade povu nian ho maneira ida ne’ebé halo populasaun sira sente katak sira hanesan objektivu principal husi prosesu dezenvolvimentu nian. Ba ita nian rai, nia fiar iha prosesu i sistema demokratiku. Tuir buat ne’ebé ami hare’e Taur Matan Ruak hanoin katak demokrasia tenke hanesan meius ida ba moris diak i ao mesmo tempo hanesan mos objektivu husi vida politika-sosial nasaun nee nian. Ida nee hakarak dehan saida? Ida nee so hakarak dehan Taur Matan Ruak fiar katak sem demokrasia ita la bele garantia governasaun ida ne’ebé bele lori aspirasaun povu nian no loke dalan liúba ditadura (iha ne’ebé dala barak liu maka lideransa politika sira garantia deit bem estar sira nia aliadus politikus ka familiares sira nian). Nia hanoin so ho demokrasia deit maka povu bele partisipa iha desizaun kona ba sira nian moris rasik.

Hanesan objektivu, nia fiar katak demokrasia liu fali diskursu politiku deit; liu fali sistema elitoral deit. Demokrasia tenke sai ita nian kultura sivika no mos governasaun. Aban bain rua ita iha sosiedade ida ne’ebé ita nia projeksaun husi ita nia án ba liur, bele inklui mos ita nia aspektu kultural ida ne’ebé demokratiku. Maske nunee balu dehan, óras nee dadaun Timor Leste presiza iha faze ida ne’ebé maka iha nesesidade ba “ditador ida ne’ebé diak (benign dictatorship)”. Barak hanoin argumentu ida nee tamba sira fiar katak demokrasia nee hanesan fin deit husi dezenvolvimentu. Tanba países so bele sai deit demokratiku winhira sira nia dezenvolvimentu ekonomiku forte ona. Kona ba ida nee Taur Matan Ruak fiar katak Timor Leste hakarak dala ida tan hatudu ístoria ba mundu. “Timor Leste hahu kedan ho fiar metin ba demokrasia”. Hanesan meius ba moris diak no hanesan objektivu husi dezenvolvimentu nasional. Ate iha sirklu akademiku, barak maka uza ezemplu husi nasaun balu hanesan Singapura husi buat ne’ebé maka ema bolu tese Lee Kuan Yew nian, la reprezenta didiak realidade global. Argumentu ida-nee’e iha problema lojiku tamba experiensia Singapura nian nee apezar iha suksesu, maibe’e ida nee representa deit nasaun ida ka rua iha mundu. Se ita kompara numeru deit, hatudu ona katak dala barak ditadura, até barak maka iha inisiu iha karakter “diak”, to’o ikus rezulta iha opresaun no iha falhansu total.

Iha kontextu ita nian, lideransa oinsa maka iha karakter demokratiku? Husi parte ami nian, ami hanoin katak ex-Komandante Em Xefe das Forsas Armadas Taur Matan Ruak hatudu tiha ona nia konviksaun ba demokrasia liu husi aksaun, no agora nee dadauk nia hakarak halo kontribuisaun barak liútan ba prosesu demokratiku. Hatudu tiha ona nia konviksaun ba demokrasia tuir dalan hanesan:

1. Nudar membro FALINTIL nia tuir diresaun altura neba husi Comandante em Chefe das FAILINTIL hodi halo forsas armadas sai neutro husi partidus politikus iha luta ba ukun án. Prosesu nee alende loke Liútan suporta ba ita nia luta husi igreja ho organizasoens nasionais internasionais oi-oin, serve mos hanesan hun husi adopsaun ba prinsipiu demokratitu multi-partidarismu iha ita nia rai.
2. Nudar komandante das Forsas Armadas nia sempre hakruk ba supremasia civil. Nia nunka viola ida nee. Nia sempre respeita lideransa sivil husi Ministro ba Defeza ho Seguransa no nia Sekretariu do Estado (ne’ebé maske iha ótas nurak liu nia. Taur Matan Ruak so unico lider ístorico ida maka halo nunee)
3. Maske iha tempo krize liúba, ida ne’ebé sai hanesan koko ida ba ita nia demokrasia, nia la viola konstituisaun da Repúblika. Nia sempre tuir konstituisaun i la hanoin aproveita situasain kaos (rungu-ranga) hodi monta kontrolo militar. Iha nia atuasaun ba dezafius hotu ne’ebé mosu nia sempre atua ho diresaun husi lideransa sivil.

Agora nia sai Prezidente karik ami fiar nia iha kompromisu forte atu halao hau nia knar tuir konstituisaun. Hanesan nia dehan fila-fila, ninian primeira pasu ba lideransa demokratika maka hakru’uk ba konstituisaun. Liliu konstituisaun hanesan ita nia ne’ebé defende principios demokratikos maka’as. Nia halo duni ida nee, nia hatudu katak nia fiar ba demokrasia nee laos “meramente diskursu politiku”. Pozisaun sa deit maka nia iha tamba konstituisaun maka fo. Tanba povu nia mandatu hatur iha lei inan. Kona ba nee nia hatutan; “se ita konsidera ida nee vale wainhira konveniente, entaun ema seluk mós bele respeita deit legitimidade prezidente nian wainhira sira sente konviniente”.

Tuirmai-nee, se for eleitu ba Presidente saida maka Taur Matan Ruak hakarak haforsa Liútan atu nunee demokrasia bele iha abut ne’ebé forte? Tuir buat ne’ebé maka ami observa husi nia nia deskursu no ami nia diskusaun durante nee, ami bele halo rezumo tuirmai:

1. Nia hakarak motiva nafatin povu ba sira nia partisipasaun iha prosesu demokratiku. Nia hanoin to’o ona tempo para povu bele uza nia votu hodi diak no nia identidade nasional la bele sai fali sekundaria ba identidade partidaria. Ida nee hakarak dehan saida? Povu sei la bele leal delek deit ba partidu ka lider ida. Sira tenke aproveita sira nia votu hodi diak para nunee partidu sira ka lideransa aspirante ba Prezidente sira bele presta konta ba povu. Se partidu sira la halo duni buat ne’ebé sira promete, povu tenke iha konsiensia atu bele vota fali seluk. Vota ba lideransa seluk laos hanesan traisaun! Tempo ba karakteriza ema hanesan traidor hotu ona. Iha ukun án nia laran traidor laíha. Se partidus sira la bele fo buat ne’ebé maka sira promete, tenke mobilize án hodi vota ba seluk.
2. Nia hakarak hametin Liútan partisipasaun sosiedade sivil no juventude sira nian. Partisipasaun sosiedade sivil nian nee indispensavel ba hametin demokrasia iha nasaun hotu. Hanesan iha 1980s sosiedade sivil halao knar ida ne’ebé krusial iha revolusaun iha rai hanesan Polonia (liu husi solidaritas), Chezckoslovakia (Velvet revolution) iha resistensia kontra Uniaun Sovietika. Iha Timor mós hanesan. Papel sosiedade sivil nian importante tebes iha ita nia resistensia no ba protesaun dos direitos humanos no auto-determinasaun ita nian. Iha tempo ukun án ida nee, papel sosiedade sivil nian indispensavel. Sira nia papel importante laos ba distribuisaun ai han ka asistensias sosiais maibe’e mos ba haburas no hametin demokrasia. Iha nee, wainhira nia temi sosiedade sivil, nia laos hanoin deit ba ONG sira. Nia definisaun ba sosiedade sivil nee abranjente ne’ebé “inklui grupos asosionais iha sosiedade nia laran hotu”. Nia hanoin ita tenke motiva atu sosiedade sivil bele fasilita prosesu partisipasaun iha demokrasia nia laran. Nia konsidera katak ba defende ita ninian valor sivika estadu deit sei labele. Sosiedade sivil sei tama ba membro ba linha da defeza husi ita nia valores sosiais i politikas. Ita nian sosiedade sivil tenke asegura liberdade emar nian no protesaun ema nian direitu.

II. Seguransa

Taur Matan Ruak dehan dala barak ona: “Hau la preokupa kona ba seguransa. Hau preokupa liu mak ho kiak no desemprego. Laíha país iha mundo maka impoin paz ho kilat. Para nasaun ida sai seguru, uluk nanain, nia ema tenke moris diak”.

Nia fiar katak atu garante lolos paz iha rai laran kilat ka kroat deit sei la kria paz iha ita rain. Laos deit hare ba investimentu iha areas militares, nia mos hakarak asegura seguransa humana. Iha nee, seguransa humana tuir lia menon husi eis-Sekretariu Geral ONU nian ne’ebé dehan, “ita tenke haluan tan ita nian definisaun kona ba paz ho seguransa. Paz signifika liu fali husi laíha funu. Ita tenke hare’e ba seguransa emar nian liu fali termus militares deit. Maibe’e, tenke englobe dezenvolvimenu ekonomiku, justisa sosial, protesaun ba meio ambiente, demokratizasaun, desarmamentu no respeitu ba direitus humanus no estado de direito”.

Nia nia vizaun ida ba futuru maka atu kria kondisaun ida ne’ebé seguru ba ita no ita nia oan sira no kria povu ida ne’ebé livre husi tauk no livre husi luta loro-loron ba ninian nesesidade bazikas. Iha kontextu nee, Taur Matan Ruak dudu ita hodi foka liúba nexus entre seguransa ho dezenvolvimentu. Sei laíha dezenvolvimentu sem seguransa, mas ao mesmo tempo sei laíha seguransa sem dezenvolvimentu. Nunee iha ita nia atendimentu ba kazus inseguransas ita tenke hare’e ninian abut husi pontu de vista sosial no ekonomiku. Ita sei responde ba problemas inseguransa iha rai laran la hodi militarizasaun. Tuir nia hare’e problemas sira ne’ebé maka oras nee mosu barak iha ita nia rai laran iha abut iha kestaun seguransa humana.

Viva Taur Matan Ruak

Vota Taur, Vota ba Demokrasia no Liberdade!

Vota ba Taur Vota ba Politika Mós, La Bobar!
publicado por Eskalabis às 14:50
link do post | comentar